mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

L’Orcolat

L’Orcolat, la creature teribil che te tradizion popolâr e tes contis dai viei e rapresente il taramot, agns dopo al torne a dismovisi in gracie des tecnichis de realtât virtuâl.

Il video realizât al presente animazions fatis cun grafiche 3D, tiessudis cun filmâts di repertori che a van drets al cûr. L’obietîf al è dopli: cjapâ dentri il spetatôr fin insot, e riprodusi in maniere fedêl la sdrumade dal Domo di Vençon chê sere dai 6 di Mai dal 1976. Lis simulazions utilizadis pal contribût dal video a son il risultât de colaborazion di un team di esperts in diviers setôrs – de inzegnerie sismiche ae computer grafiche – che si è dât dongje te Universitât dal Friûl e al à svilupât la vore cun rigôr sientific.

La ricostruzion virtuâl dal Domo e je stade realizade lant daûr de struture origjinâl dal fabricât; ogni part architetoniche slacade e je stade modelade cun precision in grafiche 3D, dibot piere su piere. Chest lavôr detaiât al à coventât par riprodusi in forme realistiche l’aspiet grafic dal Domo, e soredut par fâ cont suntun model virtuâl che al ledi a plomp pes fasis sucessivis di simulazion sismiche cul calcoladôr.

Il model virtuâl al è stât solecitât cun moviments compagns di chei capitâts al edifici reâl, rigjavâts des regjistrazions strumentâls dal taramot dai 6 di Mai fatis intune stazion su la dighe di Ambieste, a 13 chilometris di Vençon.

I struments software di simulazion fisiche/cinematiche a àn permetût di riprodusi in maniere realistiche il slac dal fabricât, daûr des condizions di vincul struturâl sugjeridis di inzegnîrs specializâts te vulnerabilitât des costruzions.

Ogni singule aree indipendent de sdrumade e je stade studiade cun analisis e revisions, fin cuant che cul computer si à cjatât animazions compatibilis adimplen cu lis ipotesis dai esperts. Chestis valutazions si à podût fâlis a traviers dal confront de animazion cu la documentazion fotografiche dal stât che si cjatave il Domo tai dîs subit dopo il taramot. Par un esempli, la posizion par tiere dal templâr sdrumât de façade ovest e à furnît indicazions claris in cont dal mût che al è colât, e chest compuartament si lu à riscontrât precîs tes simulazions cul calcoladôr.

Par incressi il realisim visîf des senis dal slac, lis simulazions in grafiche 3D a son stadis completadis cun altris elements senografics, tant che par un esempli i polvars e i detrîts dâts fûr dai slacs. Si à dât un rilêf particolâr ai aspiets sonôrs, che a son ancjemò cetant vîfs te memorie di chei che a àn vivût la tragjedie: il sunsûr di toneladis di pieris che si sdrumin, i veris a fruçons, i berlis, ma soredut il taramotament trement che al nas tal cûr de tiere e al brinche dut il cuarp. Par chel la sale di proiezion e je furnide di un implant di difusion che al è in stât di dâ fûr frecuencis infrasonichis che a fasin tornâ a vivi la vôs spaventose dal Orcolat.

© copyright 2009
Associazione Comuni Terremotati e Sindaci della Ricostruzione del Friuli