mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

La memorie, i documents

Tiere Motus e je une esposizion che a traviers di tescj e imagjinis e jude a tornâ a vivi e a capî miôr la storie dal taramot dal 1976 e de opare di ricostruzion che e je vignude daûr.

Ma no je dome chest. E je ancje un barcon viert su di une vore continue di racolte e catalogazion dai documents che a contin e a van indentri di cheste storie. E je la ponte di un iceberg, che la sô part sot aghe e je un archivi che ogni dì si inricjìs di testemoneancis privadis e uficiâls, di dâts statistics e di leçs, di ricuarts e di materiâi multimediâls, dai telegjornâi di chês primis tragjichis zornadis fin aes primis trasmissions dai radioamadôrs, che par cualchi timp a son stâts la uniche, indispensabil rêt di comunicazion tal Friûl slambrât dal taramot.

La stanzie “La memorie, i documents” e je un viaç multimediâl framieç di chescj materiâi.

Une proiezion e mostre, sul plastic orografic de regjon, il ripetisi des scossis vie pal 1976, e la fuarce e la direzion des ondis sismichis. Tor ator doi ipertescj a presentin i dâts dal sisme tai diviers comuns e une sielte di imagjinis de distruzion e de ricostruzion conseguent.

Altris trê postazions informatichis a permetin di esplorâ i documents che si cjatin tal archivi dal museu, par aprofondî ce che al ven presentât te esposizion o pûr par cognossi altris aspiets, ancje plui specialistics, dal taramot, des sôs conseguencis, e di ce che in dì di vuê si po fâ par rivâ adore di morestâ i dams e intervignî dal moment.

In fin i visitadôrs a son invidâts a cjapâ part ative e a lassâ la lôr testemoneance su di une parêt magnetiche e cuntune telecjamare.

Condividêt cul museu i vuestris ricuarts, lis vuestris cognossincis e lis vuestris opinions, di mût che di cheste tragjedie e puedin saltâ fûr bogns risultâts di solidarietât, di cjapade di cussience e di capacitât di intervent.

© copyright 2009
Associazione Comuni Terremotati e Sindaci della Ricostruzione del Friuli