mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

Un altri Friûl

Cu la ricostruzion al è vignût sù un gnûf Friûl, e des maseriis di chest taramot a son nassûts tancj risultâts.

foto Gabriele Basilico

Il prin sintiment tal cûr di ducj al è di braure par vêle puartade fûr al presit di grancj sacrificis. Si domandisi se si varès podût fâ di miôr o difarent, dulà che si à pierdût e dulà che si à vuadagnât in chest Friûl mudât.

L’Universitât dai Studis dal Friûl e nas par jessi un strument stabil dal svilup di cheste tiere. E ven istituide cun dute formalitât tal 1977 cu la leç statâl de ricostruzion. Dal Novembar dal 1978 l’Universitât e je cressude salde, sei pal numar di students e di facoltâts sei te ativitât di ricercje, cualificantsi pal leam strent cul teritori furlan.

Une gjenerazion di imprenditôrs coragjôs e previdents e governe la cressite de economie locâl. Il sisme al veve scancelât uns 18.000 puescj di vore, al jere tornât fur il boboròs de emigrazion, che par vieri e veve impuarît il Friûl. I operaris, campâts tes roulottes fûr des fabrichis, si dan di volte par disbratâ lis maseriis e tornâ a meti in vore la produzion. I imprenditôrs a tornin a fâ sù i capanons e a modernizin i implants. Al è un sfuarç coletîf fûr di misure che al da bogns risultâts: in pôc plui di un an a vegnin ripristinâts i puescj di vore, e tal 1978 i nivei ocupazionâi te zone flagjelade a son dal 17% in plui che no prin dal taramot.

La Regjon Friûl-Vignesie Julie, su la fonde de esperience madressude te ativitât di socors ae popolazion taramotade e di ricostruzion dal dopo sisme, tal 1986 e invie la creazion di une struture di protezion civîl moderne e eficient. La Protezion civîl de Regjon e impegne risorsis umanis e tecnologjichis di no crodi par rispuindi aes dibisugnis de societât civîl in cont de prevision, prevenzion, socors e recupar des condizions di sigurece tal teritori. Une particolaritât dal sisteme regjonâl di protezion civîl e je chê dal volontariât, difondût in maniere capilâr tal teritori regjonâl e struturât in Grups comunâi ae dipendence direte dal Sindic.

Dopo dal sisme l’imperatîf al è “Ricostruzion e svilup”. Se la “ricostruzion” e à un caratar plui circoscrit, il “svilup” al presupon une vision plui largje, dulà che il Friûl al à di jessi in condizion di puartâ indenant a sud des Alps la sô funzion di plateforme di colegament jenfri l’Europe dal Ovest e dal Est, e ancje fra i paîs dal Mediterani e l’Europe centrâl. Lis zonis industriâls che a son za, si ingrandissin; a nassin gnûfs centris produtîfs. A vegnin potenziadis e slargjadis lis rêts dai servizis e de viabilitât.

La Medae d’Aur al Merit Civîl, assegnade dal President de Republiche ai confenons de Regjon e dai 45 Comuns disastrâts, al è il ricognossiment de Italie pe grande dignitât, pal spirt di sacrifici e pal impegn civîl dal Friûl, che al à scrit une des pagjinis plui bielis de sô storie.

© copyright 2009
Associazione Comuni Terremotati e Sindaci della Ricostruzione del Friuli