mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

La ricostruzion e je un cantîr

Il Friûl al è un cantîr imens, l’orizont al è une selve di gruis, lis stradis a son ingolfadis pal corîr continuo dai camions. I rudinaçs e il gnûf a stan adun intun paisaç sureâl.

foto Graziano Soravito

I uficis comunâi a deventin il fîl de schene de ricostruzion. I citadins a van di lôr par vê informazions, conseis, par riclamâ dirits. Il Comun al devente il puest dulà che la int e partecipe ae ricostruzion.

Il Stât al manten i impegns: i finanziaments prometûts a rivin ducj e su la brucje. La Regjon e pronte struments adeguâts pal control de spese. E inmanee un sisteme di acuarpament dai apalts dai lavôrs par morentâ i coscj e podê realizâ i intervents ancje tes zonis plui malsestadis. Pe ricostruzion a coventin coretece e responsabilitât. La Regjon si indote dai struments necessaris par controlâ l’ûs dai finanziaments e impedî la dispersion des risorsis. La gjestion de spese e je ancje un procès democratic. Il 34% di ducj i fonts stanziâts pe ricostruzion al ven aministrât dai Sindics tant che Funzionaris Delegâts de Regjon. Il control de popolazion al è diret e capilâr.

Te zone taramotade l’urbanistiche e fâs un grant salt di cualitât, coinvolzint aministradôrs, professioniscj, citadins. Il strument urbanistic fondamentâl de ricostruzion al è il plan urban detaiât. Stant che al cjape dentri ducj, al dismôf une grande partecipazion de int. Il plan detaiât al marche la situazion di fat ante e post sisme; al stabilìs a traviers di grafics elaborâts e di normis lis sieltis de comunitât al rivuart de conformazion dal abitât, la viabilitât, la destinazion des areis, i servizis publics, lis ativitâts produtivis, lis rêts tecnologjichis, i parametris par fâ sù e lis carateristichis dai fabricâts; al fisse lis proceduris di garanzie pe tutele dal citadin. E par avantazâ la lôr atuazion, al ripartìs l’abitât in “comparts” dulà che la ricostruzion e po jessi fate cul intervent dai privâts o dal Comun.

Dut câs la ricostruzion e cjape pît ancje in gracie de solidarietât che e à compagnât il Friûl tal so percors di rinassite: tancj Stâts, ancje di lontan, a proviodin aiûts concrets pe rinassite dai nestris paîs. A son tantis lis associazions di volontariât che a rivin dongje subit dopo de scosse dal mês di Mai. L’Associazion taliane dai Alpins e puarte insom une imprese uniche: 3.280 cjasis justadis, 76 comedadis, 50 ricostruidis, 63.000 metris cuadrâts di cuvierts tornâts a meti in sest. Il guvier dai Stâts Unîts al met tes mans dai Alpins 43 milions di dolars par realizâ 7 complès scolastics e 8 centris pai anzians. La stampe taliane e foreste e da grande risonance al sisme furlan, e mobilite la opinion publiche, e organize sotscrizions destinadis ae ricostruzion. I “Fogolârs Furlans” a metin in cantîr tantis iniziativis par dâ dongje aiûts in pro dal Friûl. Ents publics, associazions e diocesis a organizin racoltis di fonts e a realizin intervents specifics.

© copyright 2009
Associazione Comuni Terremotati e Sindaci della Ricostruzione del Friuli