mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

Sience, tecniche e normis

La vore de ricostruzion e domande ae comunitât sientifiche, ai professioniscj, aes impresis e aes istituzions di rivâ adore di risolvi problemis tecnics di grande complessitât.

DT2 - Documento tecnico n. 2. Raccomandazioni per la riparazione strutturale
degli edifici in muratura, Regione Autonoma Friuli Venezia Giulia, 1977

Di fat tai agns Setante il taramot al è un fenomen ancjemò pôc cognossût in Italie. L’inzegnerie sismiche e je daûr a fâ i prins pas, par vie che no esistin precedents di cjapâ a esempli. La riparazion dai fabricâts e presente cuestions ineditis tal cjamp de inzegnerie. No si cognòs il compuartament dinamic dai fabricâts di piere, no si sa cemût intervignî par rindiju antisismics, no si sa cun cualis tecnichis comedâ i dissescj struturâi. Il mont de ricercje sientifiche e tecnologjiche si met in vore. Si fasin provis di resistence sui materiâi, a vegnin prontâts modei di calcul struturâl par instradâ la progjetazion, si studiin lis modalitâts costrutivis in stât di dâur plui tignince aes costruzions. La sfide e ven cjapade sù, e in curt e puarte a un disvilup rapit des cognossincis e a une lôr difusion ancjetant rapide.

In plui dai dams dai edificis il taramot al prodûs ancje slambris tal ambient naturâl, mudant des voltis lis carateristichis dal paisaç. Centenârs di lavinis a vierzin feridis largjis jù pes cuestis des monts. Sclapa-duris profondis a scjavacin il teren. Di sot tiere a saltin fûr spissui di aghe miscliçade cun savalon. I efiets dal taramot a inviin un procès di cognossince util pe prevenzion e pe gjestion de emergjence tal câs di gnûfs events di cheste fate. I tancj studis di microzonazion puartâts indenant tes zonis plui pacadis dal sisme a rapresentin pardabon un vêr cambiament. A vegnin delimitadis lis zonis che a àn plui grant pericul gjeologjic, sismic, idrologjic e di slacs.

Cun di plui si capìs che il procès di ricostruzion al à bisugne di trasparence, di regulis condividudis, di parametris tecnics e economics sigûrs, di control dai coscj. Tal 1977 a vegnin aprovadis lis leçs fondamentâls che a fissin lis liniis-vuide pe ricostruzion dal Friûl: la Leç Statâl 8 di Avost dal 1977 n. 546, la Leç Regjonâl 26 di Jugn dal 1977 n. 30 in cont de riparazion des cjasis, des oparis di riparazion struturâl e di adeguament antisismic, e la Leç Regjonâl 23 di Dicembar dal 1977 n. 63 in cont de ricostruzion. La sveltece de azion legjislative, la entitât dai finanziaments e la previdence e intuizion che a caraterizin chescj proviodiments a son par mert dai Parlamentârs furlans e dai Conseîrs regjonâi, che a van di là des divisions politichis par rivâ a imbastî une fuarte unitât di intindiments. La normative statâl e semplifiche lis proceduris, e destine i finanziaments, e decentre la responsabilitât di dute la ricostruzion ae Regjon Friûl-Vignesie Julie. La legjislazion regjonâl e met in vore un altri grant decentrament in pro dai Ents Locâi. E definìs lis struturis istituzionâls delegadis ae ricostruzion, e e met sù lis struturis tecnichis che a àn di verificâ se lis normis a vegnin aplicadis come cu va.

© copyright 2009
Associazione Comuni Terremotati e Sindaci della Ricostruzione del Friuli