mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

Tornâ a scomençâ

Vie pal Unvier dal 1976-1977 il Friûl al gambie muse.

foto foto Elio e Stefano Ciol

Intant che lis comunitâts a son sfoladis su la cueste, tes zonis taramotadis si dai di côt par fâ sù i lozaments provisoris, che a varan di dâi acet ae popolazion tai agns di une lungje ricostruzion. Lis dificoltâts a son boconis. A coventin di buride un censiment de int cence cjase, la individuazion des superficiis dulà implantâ i vilaçs provisoris, la realizazion des oparis di urbanizazion, la instalazion di une cuantitât grandonone di prefabricâts.

La scjadince dai 30 di Avrîl dal 1977, fissade come tiermin par che la int e torni tai paîs taramotâts, e ven rispietade. In pôc plui di siet mês, vie pal Unvier, che al è stât plui crût dal solit, a vegnin dâts dongje 350 vilaçs sparniçâts in 91 Comuns. A son 20.000 lozaments che a dan acet a 75.000 di lôr, e a nassin dentri vie dai paîs in gracie dal Esercit, dai Vigjii dal Fûc, dai tecnics dal Enel e de societât telefoniche SIP, des impresis e dai tancj volontaris talians e forescj. A vegnin implantâts ancje i prefabricâts a ûs di buteghis, di ativitâts artesanâls e agriculis, di servizis publics e privâts, che ju proviodin l’Ent Svilup Artesanât (ESA), l’Ent Regjonâl Svilup Agriculture (ERSA), la Cjamare di Cumierç, lis Associazions di categorie, lis Puestis Talianis.

A tachin i agns des “barachis”. Dulintor maseriis e desolazion. Dopo dal disastri i rudinaçs a vegnin puartâts vie. Si à di decidi se recuperâ o butâ jù i fabricâts danegjâts. Lis prioritâts a vegnin detadis a traviers dai Plans. A vegnin cjatâts fûr i esecutôrs e lis discjariis. A vegnin pontâts i fabricâts di podê recuperâ o tacâts di chei di sdrumâ. Lis demolizions a deventin un pont di partence decisîf pe ricostruzion.

Cundut achel la vite si ripie ancjemò une volte. I prefabricâts, organizâts in vilaçs dulà che si torne a inmaneâ la vite des borgadis distrutis, a proferissin a lis fameis une sistemazion provisorie ma dignitose. La vite si ripie dutun cu lis voris di ogni dì. Si svilupe une ativitât politiche e sociâl ferbint, e il so teme principâl al ven clamât in struc “ricostruzion e svilup”.

Vinci la scomesse de ricostruzion, che si capìs, al domande un sfuarç straordenari di ducj. Al è il moment de discussion e dal confront. I Comitâts des baracopolis a vierzin la strade de partecipazion. A vegnin stabilîts i criteris dulà e cemût ricostruî. Cul tornâ a cjase si impie il dibatit in cont de ricostruzion. Ogni comunitât e resone cui siei aministradôrs dulà e cemût fâ sù lis gnovis cjasis, i edificis publics, i servizis, lis infrastruturis. Ancje i tecnics a jentrin te discussion. I Plans de ricostruzion si ju presente e si ju discut tes sembleis publichis. Il dibatit al devente vivarôs. Il confront cualchi volte al è ruspi, ma al finìs par sei util e costrutîf. No si intint cedi su doi principis: la ricostruzion si à di fâle dulà che al jere e cemût che al jere. Lis prioritâts a son: prime lis fabrichis, po lis cjasis, e infin lis glesiis.

© copyright 2009
Associazione Comuni Terremotati e Sindaci della Ricostruzione del Friuli