mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

Lis replichis e l’esodo

L’Orcolat, il taramot, nol à finide la sô vore.

foto Mauro Galligani

Dal mês di Mai e par dut l’Istât la int e à resistût ae disperazion des scossis cence padìn. Ma a metât Setembar, bot e sclop la ativitât sismiche si ripie rabiose. Dai 11 ai 15 di Setembar dal 1976 il flagjel sismic al scjasse e al fische la tiere di gnûf. Par cinc zornadis a la lungje 79 scossis a scunissin dutis lis sperancis, a cjoncin la volontât dai oms e a lassin scaturît il popul des tendis.

I edificis ruvinâts a colin a flics cence remission. Lis cjasis justadis a son danegjadis di gnûf. Lis stradis a son blocadis ancjemò une volte dal dilembo di slacs bocognons e di côi di rudinaçs. Dutis lis fadiis fatis vie pal Istât a van sù pal stec.

Il Friûl al sprofonde tune situazion cetant plui grivie di chê di Mai, che e palese la impussibilitât di meti in vore i slogans “di bessôi” e “des tendis aes cjasis”, parie cu la ineficacitât de Leç Regjonâl n. 17/76 che no previôt riparazions struturâls e cun adeguament antisismic.

La situazion e je tant disperade che il Guvier al torne a mandâ in Friûl il Comissari Straordenari, l’on. Giuseppe Zamberletti, che al è in podê di decidi a plen. Tante int e met in vore un vêr esodo. Lungjis filis di camions civîi e militârs si slontanin cu la lôr cjame di garbatui e di personis plenis di aviliment pal distac e pe inciertece dal doman. Pal Comissari al è un impegn mostro e dolorôs. Al covente di cjatâ fûr un sotet par 40.000 di lôr che a àn di jessi trasferîts des zonis taramotadis bande lis localitâts balneârs di Grau, Lignan, Bibion, Jesolo, Caorle e la localitât di mont di Ravasclêt, garantintjur l’assistence. La preocupazion principâl e je chê di mantignî saldis lis comunitâts ancje tai lûcs de gnove destinazion. I Comuns a viodin di lôr midiant di delegazions aministrativis metudis sù di pueste tes localitâts dai sfolâts.

A vegnin ativâts colegaments direts jenfri i lûcs di provignince dai taramotâts e chei che ur dan acet, cun autobus che ogni dì a traspuartin miârs di personis obleadis a fâ un pendolarisim che al scane.

© copyright 2009
Associazione Comuni Terremotati e Sindaci della Ricostruzione del Friuli