mostre permanent

palazzo Orgnani Martina - via Mistruzzi n. 4/9
33010 Venzone (UD)

 

ORARI DI APERTURA
venerdì : 15 - 19

sabto e domenica : 9 - 13 / 15 - 19

 

BIGLIETTI
interi : 5 euro / ridotti : 4 euro / scolaresche : 3 euro

Un istât di vite e di lavôr

L’Istât dal 1976 e je une stagjon dificil fûr di mût.

foto Mauro Galligani

La popolazion taramotade e scuen vivi tes tendis. I militârs a ‘nd implantin 17.782 par un totâl di 116.000 puescj jet. A rivin di ogni bande, fintramai de Miezelune Islamiche (l’ecuivalent de Crôs Rosse) e dai paîs de Europe dal Est. La solidarietât di privâts e di ents publics e fâs rivâ dongje in Friûl passe 5.200 roulottes par uns 15.000 di lôr. 170 carocis feroviariis a completin il cuadri dai ricovars provisoris.

Ator pai paîs a zirin leiendis, superstizions e cjacaris che cualchi volte a produsin une pôre no justificade. Ma tal Istât dal 1976 la razionalitât e cjape il puest des emozions e des pôris. La stampe locâl e fâs une opare preseose di informazion ripuartant il spieli precîs di ce che al sucêt te zone taramotade. E fâs ancje une operazion impuartant di divulgazion di cognossincis sientifichis e tecnichis in colaborazion cun sienziâts e specialiscj. Ducj a son in stât di cognossi i proviodiments inmaneâts dal Guvier nazionâl e de Regjon, la situazion dai aiûts e i intervents di ricostruzion che a stan cjapant pît. Lis comunitâts a àn sot man i struments par partecipâ cun cognizion al confront e al dibatiment cui lôr aministradôrs.

E je fuarte la voe di fâ, di ricostruî, di tornâ ae normalitât ancje se il dolôr e lis dificoltâts no àn finiment. Cu la Leç regjonâl n. 17 dai 7 di Jugn dal 1976 si comedin lis cjasis ruvinadis. Un grum di lavoradôrs a corin dongje tes aziendis par disbratâ lis maseriis, par salvâ lis materiis primis, par protezi e meti in sest i implants. Za ai prins di Jugn ciertis fabrichis a tornin a inviâ l’ativitât.

Il spirt dal “fasìn di bessôi” al fâs nassi une organiza-zion sociâl di base, slargjade e buine di risolvi i problemis di prime necessitât. La partecipazion popolâr e salte fûr spontanie e imediade par vie che e ven pocade de volontât di puartâse fûr: la int e fronte in prime persone ancje lis esigjencis primariis. Cun di fat lis struturis sociâls e istituzionâls, ancje lôr sdramassadis dal taramot, a àn cif e çaf a sodisfâlis dutis e dal moment.

E je ancje l’ore di riclamâ cun fuarce il dirit di vê a la svelte une rispueste pes propriis dibisugnis. Lis tendopolis si organizin bessolis, a rinfuarcin il leam des comunitâts locâls, a son un presidi dal teritori. In curt cheste volontât e devente une bisugne di partecipâ a lis decisions de Autoritât. Partint di Glemone, dulà che dopo a pene dodis diis dal taramot si publiche il sfuei ciclostilât “Boletin di coordenament des tendopolis”, il moviment si slargje tai Comuns dongje. Al nas il “Coordenament dai paîs taramo-tâts”. Il moviment si rinfuarce in gracie de adesion di associazions, comitâts e grops spontanis. Lis istituzions a ricognossin che la soluzion dai problemis e pretint une prove di grande democrazie.

Il popul des tendis al fâs sintî la sô vôs.

© copyright 2009
Associazione Comuni Terremotati e Sindaci della Ricostruzione del Friuli